რაც უნდა კარგად სტრუქტურირებული სტრუქტურა გვქონდეს, რაც არ უნდა ღირებული გადაწყვეტილებები ჩავდოთ სტრუქტურაში, რაც არ უნდა სწორად გავანაწილოთ როლები და ადამიანები, სტრუქტურა მაინც თავიდან გვექნება გასაკეთებელი თუ ზედა დონეზე ორგანიზაციის დანიშნულება და ამოცანები გააზრებული და შეთანხმებული არაა.

ორგანიზაციები, სადაც, სტრუქტურის ფორმირებისას, ამ ეტაპს ტოვებენ ან ნაკლებ ყურადღებას აქცევენ, არასწორ პრიორიტეტებს ემსახურებიან და არ და ვერ ასრულებენ თავის რეალურ დანიშნულებას. შეიძლება ამ სტრუქტურით უკუგებასაც იღებდნენ, თუმცა ნაკლებად იმ ნაწილიდან, რომელსაც სარგებლის შექმნა შეუძლია მომხმარებლისთვის.

დანიშნულების გააზრება და სტრატეგიულ ამოცანებზე შეთანხმება გვეხმარება, თავიდან ავიცილოთ, შევქმნათ არასწორი ორგანიზაცია, სადაც სტრატეგიული ამოცანების ნაცვლად სხვა ამოცანები გამხდარა ტოპ–მენეჯმენტის პრიორიტეტი, სადაც სტრატეგიულ ამოცანებს პასუხისმგებელი პირები არ ჰყავთ, სადაც საშუალო და ქვედა დონეზეც სტრუქტურაში ამოცანების არასწორი იერარქიაა.

გვაქვს თუ არა სტრუქტურა თავიდან გასაკეთებელი, ამისთვის საკმარისია სულ რამდენიმე წუთით დაფიქრება, ჩვენი ორგანიზაციის დანიშნულების და ამოცანების განსაზღვრა და ჩვენს სტრუქტურასთან შედარება. მაშინვე გამოიკვეთება, თუ გაუმჯობესების რა შესაძლებლობები გვაქვს. თუმცა ჩვენი გამოცდილებით თუ გვინდა, რომ ამ პროცესმა მაქსიმალურად სასარგებლოდ ჩაიაროს, დაახლოებით 2–3 საათის დათმობა, გააზრებული ამოცანებისა და არსებული სტრუქტურის შესაბამისობის გუნდურ ფორმატში განხილვა დაგვჭირდება.