რამდენად სწორად და კარგად არის დებულება მომზადებული, რამდენად ცხადად ასახავს ის სტრუქტურული ქვედანაყოფის ან კონკრეტული პოზიციის მიზანს, ამოცანებს, ფუნქციებს და პასუხისმგებლობებს, რამდენად ეს გადაწყვეტილებები თანხვედრაშია ერთმანეთთან და სხვა პოზიციების და ქვედანაყოფების აღწერებთან, მნიშვნელოვნად განსაზღვრავს ორგანიზაციის გამართულ ფუნქციონირებას.

დებულებების მომზადებისას რამდენიმე მნიშვნელოვანი საკითხია გასათვალისწინებელი:

ა) დებულება არასოდეს არ უნდა დაწეროს იმან, ვინც ამ დებულებით უნდა იხელმძღვანელოს. სხვა შემთხვევაში ის სათანადოდ ხარისხიანი და ღირებული არასდროს გახდება.

ბ) დებულებების მომზადებისას გამოყენებული უნდა იყოს ერთი და იგივე ენა, სტილი, სტრუქტურა, რათა ადვილი იყოს მათი ერთმანეთთან შესაბამისობაში მოყვანა.

გ) დებულებების მომზადებისას უფრო მეტი მნიშვნელობა აქვს როგორ არის გაყოფილი როლები სტრუქტურებს და პოზიციებს შორის, ვიდრე ის, თუ რამდენად დეტალურია თითოეული დოკუმენტი. ამდენად მნიშვნელოვანია ზედმეტად დეტალიზებული არ იყოს და შესაბამისობაში იყოს სხვა პოზიციების აღწერებთან.

ამ სამი მოთხოვნის დაცვა იმ შემთხვევაშია შესაძლებელი, თუ სტრუქტურის დანერგვისას დებულებების ფორმირებას ამ მიზნით სპეციალურად შექმნილი გუნდი ითავებს, თვითონ მოამზადებს სამუშაო ვარიანტებს, მერე განიხილავს და დააკორექტირებს უკვე შემსრულებლებთან ერთად, მისცემს მათ საბოლოო დოკუმენტების სახეს და მოამზადებს დასამტკიცებლად.