ხშირად ხდება ისე, რომ ორგანიზაციაში ადამიანი, ვისაც მნიშვნელოვანი პასუხისმგებლობა აკისრია არ ფლობს ამ პასუხისმგებლობის შესაბამის ძალაუფლებას. ასევე ხდება ისეც, რომ ადამიანების ნაცვლად, ვისაც დიდი ძალაუფლება აქვთ, პასუხისმგებლობა სხვა ადამიანებს ეკისრებათ. ამ ორივე შემთხვევას ხშირად ერთი და იმავე ორგანიზაციებში აქვს ადგილი. ორგანიზაციებში, სადაც ძალაუფლების და პასუხისმგებლობის ბალანსი არსებითად არის დარღვეული.

ადამიანები, ვისაც პასუხისმგებლობა აკისრია, მაგრამ არ აქვთ ძალაუფლება მიიღონ გადაწყვეტილებები ამ პასუხისმგებლობის რეალიზებისთვის, დიდი ფსიქოლოგიური წნეხის ქვეშ არიან, მნიშვნელოვანი სტრესის პირობებში უწევთ მუშაობა. დროთა განმავლობაში არაპროდუქტიულები და ქმედითუუნაროები ხდებიან ან ხვდებიან ამ საფრთხეს და დროულად ტოვებენ ორგანიზაციას.

ბევრად უფრო ცუდი შედეგებია იმ ადამიანების შემთხვევაში, ვისაც დიდი ძალაუფლება აქვს, მაგრამ პასუხისმგებლობა მათ შეცდომებზე სხვას ეკისრება. ასეთი ადამიანები “ორგანიზაციული მონსტრები” ხდებიან. გიგანტიზმით ავადდებიან. არაკონსტრუქციულები არიან კოლეგებთან მიმართებაში, მთლიანი ორგანიზაციის ინტერესების რაკურსით აღარ უყურებენ პროცესებს, ამ ძალაუფლების ბოროტად გამოყენებას იწყებენ მასთან დაკავშირებული სხვადასხვა გამოვლინებებით.

ორგანიზაციული არქიტექტორი, ვინც ასეთი ორგანიზაციის სტრუქტურის დიზაინზე მუშაობს, ყოველთვის უნდა ეცადოს იპოვოს ძალაუფლების და პასუხისმგებლობის არსებითი დისბალანსი სტრუქტურაში და გამოასწოროს ის.

ივნისი, 2013წ