“инициатива наказуема” – არ ვიცი ვის ეკუთვნის ეს ფრაზა, მაგრამ ძალიან გვაქვს სისხლში გამჯდარი მსგავსი დამოკიდებულება. ბევრი თვლის, რომ ინიციატივებით გამოსვლას არანაირი აზრი არ აქვს, მაინც არავინ მოუსმენს, მაინც არავინ დაინახავს. ძალიან ბევრი ნიჭიერი, ჭკვიანი, შემოქმედებითი ადამიანი სამსახურში დროის ნახევარს უფუნქციოდ ატარებს, აკეთებს მარტივ საქმეს, რომელიც არ მოსწონს და ელოდება საიდანღაც დაწინაურებას, წარმატებასა და წინსვლას.

რა თქმა უნდა, არაჩვეულებრივია ორგანიზაციაში მუშაობა, სადაც მენეჯმენტი მაქსიმალურად ხელს უწყობს თანამშრომლებს ინიციატივებით გამოსვლაში, მაგრამ როცა სხვანაირ კომპანიაში მოხვდი, შენ უნდა იმოქმედო და გადალახო პასიური რეჟიმი.

ჩვენი რჩევაა, ყოველდღიურად ან კვირაში ორჯერ მაინც ნახევარი საათის გამოყოფა და კონკრეტულ პრობლემაზე, საკითხზე ფიქრი და იდეების გენერაცია. შემდეგ სხვა თანამშრომლებიც შეიძლება აიყოლო და გუნდურად იმუშავოთ, კვირის ბოლოს კი ხელმძღვანელთან განიხილეთ ეს იდეები, ან მეილზე გადაუგზავნეთ. დროთა განმავლობაში იდეებიც უკეთესი გაგიჩნდებათ, ხელმძღვანელობაც დაინახავს თქვენს შესაძლებლობებსა და შრომისმოყვარეობას, რაც ხშირად დადებითად აისახება კარიერაზე.

და მაინც, თუ ვერავინ შეამჩნია თქვენი აქტივობა, თქვენი იდეები მიიტაცეს, ან დააიგნორეს, მაინც არ შეწყვიტოთ ამის კეთება, რადგან განივითარებთ კრიტიკულ აზროვნებას, პრობლემების გადაჭრის, საკუთარი აზრის გამოთქმისა და არგუმენტირების უნარს, შემოქმედებით ფიქრს, უფრო მეტ საკითხში გაერკვევით, და თუნდაც სხვაგან, გასაუბრებაზე მოხვედრისას, მოიწონებთ თავს თქვენი პროაქტიულობით. მთავარია გჯეროდეთ, რომ არავინ დაგსჯით ინიციატივების გამო.