ჩვენ ვაკეთებთ ორგანიზაციულ სტრუქტურებს. ძალიან ბევრი გვეკითხება, რატომ არ ვაკეთებთ ბიზნეს გეგმებს, გაყიდვების გეგმებს და სხვა მრავალ პროექტს, რომლის გაკეთებაც შეგვიძლია, თუნდაც არც თუ ისე ცუდად. იყო პერიოდი, როდესაც ვეხმარებოდით ორგანიზაციებს ნებისმიერი რთული საკითხის გადაწყვეტაში. მიზეზები უამრავია, თუ რატომ ავირჩიეთ მაინცდამაინც სტრუქტურების კეთება, მაგრამ უფრო მნიშვნელოვანია ის განსხვავება, რაც კონკრეტულ მიმართულებაზე აქცენტირებით მივიღეთ:

1. უამრავი ახალი კლიენტი – მანამდე თუ კლიენტებს ვეხმარებოდით ნებისმიერი პრობლემის გადაჭრაში, დრო აღარ გვრჩებოდა ახალი კლიენტების მოსამსახურებლად, ახლა კი გაცილებით მეტი ორგანიზაციისათვის ვქმნით ღირებულებას.

2. კომპეტენციების გაღრმავება – ყოველ ახალ პროექტზე საჭიროა, ახალი მიდგომის მოფიქრება, ახალი გზის ფორმირება, ახალი გადაწყვეტილებების პოვნა, რაც ყოველთვის კარგად არ გამოდის. კონკრეტულ მიმართულებებზე აქცენტირებით სწავლობ, როგორ აკეთო უკეთესად, უფრო მოქნილად, ხარისხიც მატულობს და კლიენტის კმაყოფილებაც.

3. განვითარება – კონკრეტული მიმართულებით აქცენტირება საშუალებას გაძლევს კიდევ უფრო განვითარდე – სწავლობ პოტენციურ კლიენტებთან  ურთიერთობის და მოზიდვის გზებს, ასტაბილურებ შემოსავლებს, არსებულ პროდუქტში პოულობ და იყენებ ახალ შესაძლებლობებს.

4. ორგანიზაციის აღქმა – კლიენტებმა ზუსტად იციან, ვინ ვართ და რას ვაკეთებთ ყველაზე კარგად, მანამდე კი ძალიან ბუნდოვანი იყო კომპანიაზე წარმოდგენები.

ორგანიზაციებმა, რომლებსაც ძალიან ცხადი ფოკუსი აქვთ, იციან, ზუსტად რას ემსახურებიან, ვინ არიან კლიენტები და რა პროდუქტებს სთავაზობენ მათ, ისწავლიან ამ ყველაფრის უკეთესად კეთებას, მიაღწევენ კლიენტთა კმაყოფილებას, შემოსავლების ზრდასა და სხვა წარმატებებს.