ძალიან ბევრ ორგანიზაციაში სტრუქტურული ცვლილებები რთულად მიმდინარეობს, ვინაიდან არსებულ თანამშრომლებს, მენეჯმენტის წევრებს აქვთ შიში ცვლილებების მიმართ – ცხადად ვერ ხედავენ საკუთარ ადგილს ახალ სტრუქტურაში, არ იციან ახალი სტრუქტურა როგორ იმუშავებს, რამდენად შეძლებენ ახალი როლების მორგებას.

ასეთ დროს ძალიან მნიშვნელოვანია ხელმძღვანელის შეუპოვრობა და თავდაჯერებულობა. როგორც კი ის იწყებს ყოყმანს მაშინ, როდესაც აუცილებელია ახალი სტრუქტურა ახალი მიზნებისა და ამოცანების გადასაწყვეტად, გუნდის წევრები არწმუნებენ მას, რომ დიდი ცვლილებები რთულად განხორციელდება, რაც აქვთ ისიც დაინგრევა და აღებინებენ ხელს რეორგანიზაციაზე.

სწორედ ამიტომ, ლიდერი დარწმუნებული უნდა იყოს სტრუქტურული ცვლილებების აუცილებლობაში. იგი ცხადად უნდა ხედავდეს არსებული სტრუქტურის პრობლემებს და ახალი სტრუქტურის საჭიროებას. ის არ უნდა შეუშინდეს ცვლილებებს, რომელიც სამუშაო რეჟიმიდან ამოაგდებს ორგანიზაციას, თუმცა ახალ კალაპოტში დააყენებს მას და ახალ შედეგებს, ახალ წარმატებებს მიაღწევინებს.