თუ მუდმივად გვეცოდინება, რამდენად არიან კმაყოფილები ჩვენი ორგანიზაციით ჩვენი კლიენტები, თანამშრომლები და მთავარი საქმიანი პარტნიორები, გვექნება შესაძლებლობა, ნელ-ნელა უფრო და უფრო კონკურენტუნარიანები გავხდეთ სამივე ამ ჯგუფისათვის. ამის გაგება კი ძალიან მარტივადაც შეიძლება.

საკმარისია შევქმნათ პოზიცია ჩვენს ორგანიზაციულ სტრუქტურაში, რომელსაც პირობითად “უკუკავშირის მენეჯერი” შეიძლება დავარქვათ, და დავავალოთ მას ყოველთვიურად თუ არა, ყოველკვარტალურად მაინც, მოგვიმზადოს ანგარიში თითოეული ამ ჯგუფის მიხედვით, დაიწყება პროცესი, რომელიც, საბოლოო ჯამში, ძალიან მნიშვნელოვნად შეუწყობს ხელს ჩვენი ორგანიზაციის კონკურენტუნარიანობის ამაღლებას.

სასურველია, ეს ადამიანი სტრუქტურულად არ დაექვემდებაროს არც წარმოებაზე (პროდუქციის თუ მომსახურების), არც განვითარებაზე პასუხისმგებელ ხელმძღვანელებს. უმჯობესია, პირდაპირ პირველ პირთან იყოს დაქვემდებარებაში, ან გაყიდვებზე, ან ბრენდის განვითარებაზე პასუხისმგებელ ხელმძღვანელთან მაინც. ეს მას მისცემს საშუალებას, უფრო ობიექტურად გააანალიზოს მიღებული ინფორმაცია და უფრო სასარგებლო ანგარიშები მოამზადოს.

ამოცანის დასმა საკმარისია იმისათვის, რომ ამ ადამიანმა თვითონ დაიწყოს გზების ძებნა, თუ როგორ შეიძლება ამ ჯგუფების მარტივად გამოკითხვა. ის პირველ ეტაპზე გაარკვევს მათ ვინაობას, დაიწყებს მათთან პირდაპირ კონტაქტს და შერჩევით გამოკითხვებს როგორც პირადად, ისე ტელეფონის ან მიმოწერის მეშვეობით. დროთა განამავლობაში კი ის ინფორმაციის სტაბილური არხების აწყობას დაიწყებს, რომელთა მეშვეობითაც ასეთი ინფორმაცია მუდმივად შემოვა მენეჯმენტთან.

თუ ასევე ყველა მომზადებულ ანგარიშს შეაფასებთ, თუნდაც სამბალიანი სისტემით, როგორც საშალო, კარგი, ან ძალიან კარგი, და დაეყრდნობით ამ შეფასებისას თუ რამდენი ადამიანის გამოკითხვა მოხდა, რა მეთოდებით და რამდენად სასარგებლო აღმოჩნდა მენეჯმენტისათვის მომზადებული ანგარიში, მაშინ უკუკავშირის მენეჯერის მუშაობის ხარისხი და პროდუქტიულობა კიდევ უფრო სწრაფად გაიზრდება და ორგანიზაციასაც დიდ სარგებელს მოუტანს.