წარმოიდგინეთ რამხელა ეფექტი შეიძლება ჰქონდეს აგრარული უნივერსისტეტის  თბილისიდან თელავში გადატანას?! მნიშვნელოვნად შეიცვლება ქალაქის ეკონომიკა, გაჩნდება დამატებითი სამუშაო ადგილები, ამაღლდება ცხოვრების დონე. უხეში გათვლებით გამოდის, რომ აგრარული უნივერსიტეტის თელავში გადატანით ქალაქის შემოსავლები გაიზრდება დაახლოებით 1 მილიონი ლარით თვეში.

აგრარულ უნივერსიტეტში სწავლობს 4 000-მდე სტუდენტი. ერთმა სტუდენტმა მარტო ჭამაზე და გზაში თვეში რომ დახარჯოს 100 ლარი ანუ დღეში 3-4 ლარი, ქალაქის შემოსავლები გაიზრდება 400 000 ლარით.

ცალკე ავიღოთ შემოსავლები ქირიდან. გაქირავების თანხად, რომ ავიღოთ თვეში 150 ლარი, გამოდის რომ 4 000 სტუდენტიდან ქალაქი მიიღებს კიდევ 600 000 ლარს. ანუ ჯამში გამოდის 1 მილიონი ლარი. წარმოიდგინეთ ეს რამხელა დამაებითი შემოსავალია ქალაქისთვის სადაც ცხოვრობს საშუალოდ 17 000 ოჯახი (70 000 კაცი). ფაქტიურად ყოველ მეოთხე ოჯახს ეყოლება მდგმური, რაც  ნიშნავს მისთვის დამატებით შემოსავალს ქირიდან.

ეს კარგი იქნება არა მარტო ქალაქისთვის, არამედ სტუდენტებისთვისაც და თვითონ უმაღლესი სასწავლებლებისთვისაც. სტუდენტებს თელავში ცხოვრება დაუჯდებათ გაცილებით იაფი, მათ მნიშვნელოვნად შეუმცირდებათ ტრანსპორტირებისა და ბინის ქირის ხარჯი. ხოლო უმაღლეს სასწავლებლები თბილისში ფართის გაყიდვით ან გაქირავებით შეძლებენ თელავში გაცილებით უკეთესი და თანამედროვე სასწავლო კორპუსების აშენებას ვიდრე აქვთ ეხლა. რაც მთავარია სხვა ქალაქში გადასვლა უარყოფითად არანაირად არ აისახება სტუდენტთა რიცხოვნობაზე.

იგივე შეიძლება გაკეთდეს სხვა უმაღლესი სასწავლებლების შემთხვევაშიც. მაგალითად: თბილისის ტექნიკური უნივერსიტეტი ე.წ. “გეპეი” გადავიდეს რუსთავში, სამხატვრო აკადემია სიღნაღში და ა.შ.

ასევე ეს შესაძლებლობა წესით ძალიან საინტერესო უნდა იყოს დეველოპერებისთვისაც. მათ გაუჩნდებათ ახალი პროექტები და კრიზისიდან გამოსვლის დამატებითი შესაძლებლობა. მათ სამთავრობო სტრუქტურებთან ერთად შეიძლება ორგანიზება გაუწიონ ამ პროცესის დაწყებასა და განხორციელებას.