როგორც ადამიანისთვის, უკეთესი მეგობარი ის კი არ არის, ვინც მუდმივად მას აქებს და ადიდებს, არამედ ის, ვინც მას მისი ნაკლოვანებების დანახვაში და გამოსწორებაში ეხმარება. ასეა ორგანიზაციებისთვისაც. ის კლიენტები, თანამშრომლები თუ საქმიანი პარტნიორები, რომლებიც ორგანიზაციის პრობლემებზე, მის მუშაობაში არსებულ ხარვეზებზე ლაპარაკობენ განსაკუთრებით ღირებულები და მნიშვნელოვნები არიან ორგანიზაციისთვის.

ასეთ ადამიანებს ორგანიზაცია განსაკუთრებული მონდომებით უნდა ეძებდეს. მათ ძალიან დიდი ყურადღებით უნდა უსმენდეს, ცდილობდეს მათგან შემოსულ საჩივრებზე და პრეტენზიებზე სწორი და დროული რეაგირება მოახდინოს. მერე კი თვითონ მათაც უნდა აცნობდეს მათ მიერ დაფიქსირებულ საკითხებს რა რეაგირება მოჰყვა.

რაც უფრო მეტი ადამიანი (კლიენტი, თანამშრომელი, პარტნიორი) მიიღებს ამ ფორმით ორგანიზაციის განვითარებაში მონაწილეობას, რაც უფრო მეტად იქნება მათი პრეტენზიები გათვალისწინებული, მით უფრო სწრაფად გაიზრდება და განვითარდება ორგანიზაციაც.

სამწუხაროდ, ორგანიზაციების დიდი ნაწილი, მინიმუმ არ ცდილობს, რომ რაც შეიძლება მეტი ასეთი ადამიანი მოძებნოს და მათგან მაქსიმალურად ბევრი ინფორმაცია მიიღოს საკუთარი პრობლემებისა და ნაკლოვანებების შესახებ. ბევრი პირიქით, ასეთ კლიენტებს, თანამშრომლებს, პარტნიორებს განსაკუთრებით ცუდად ექცევა, ცდილობს დაუმტკიცოს, რომ ისინი მართლები არ არიან. ამით სრულიად უკლავს მათ მომავალში მსგავსი პრეტენზიების წამოყენების სურვილს.