ის, რაც ქვეყნის ეკონომიკისათვის საშუალო და გრძელვადიან პერიოდში ძალიან მნიშვნელოვანია, ხშირად საინტერესო არ არის კერძო მეწარმეებისათვის მოკლევადიან პერიოდში. მეწარმეები ხომ საკუთარ პრიორიტეტებს ძირითადად სწორედ მოკლევადიანი ინტერესებიდან საზღვრავენ. თუ სახელმწიფო შეძლებს მათ მიმდინარე ინტერესი გაუჩინოს ისეთ პროექტებზე, რაც მათაც და ქვეყნის ეკონომიკასაც ეფექტს აუცილებლად მოუტანს საშუალო ან გრძელ ვადაში, ეკონომიკის განვითარებასაც დაეხმარება და სამუშაო ადგილების შექმნასაც შეუწყობს ხელს.

იმპორტშემცვლელი წარმოების ხელშეწყობა, ექსპორტის განვითარების ხელშეწყობა, მცირე ბიზნესის ხელშეწყობა, მოხმარების ზრდის სტიმულირება ქვეყანაში, ქვეყნის პოპულარიზაციაზე ზრუნვა, ცალკეული ქვეყნებიდან საქართველოს მიმართულებით ავიაბილეთების მაქსიმალურად გაიაფებაზე ზრუნვა – სეზონებზე მაინც, სასტუმროების გაიაფებაზე ზრუნვა, სოფლის მეურნეობის ადგილობრივი პროდუქციის შეძენის პროპაგანდა, ზოგადად ქართული წარმოების პროდუქტების მოხმარების პროპაგანდა, ამ მიმართულებით არასამთავრობო სექტორის წახალისების გზით და ა.შ. – სწორედ ის საკითხებია, რომელთა გადაწყვეტაც აღნიშნულ კონტექსტში უნდა ხდებოდეს.

ამ მიმართულებებით სახელმწიფომ უნდა სცადოს მოკლევადიანი ინტერესი გაუჩინოს კერძო მეწარმეებს იმის კეთებაზე, რაც ზუსტად იცის, რომ მათთვისაც და შესაბამისად მთლიანად ქვეყნისთვის საშუალოვადიან თუ არა, გრძელვადიან პერიოდში მაინც აუცილებლად იქნება ეკონომიკურად მომგებიანი.

მოკლევადიანი ინტერესების გაჩენა კი ბევრნაირად შეიძლება. შესაბამისი საკანონმდებლო ცვილილებებიდან და საინვესტიციო პროგრამებიდან დაწყებული, ცალკეულ საკითხებთან დაკავშირებული პროპაგანდის კამპანიებით დამთავრებული.