ადამიანების სწორად შერჩევა არის ის საქმე, რომელზეც ყოველი ლიდერი უნდა ხარჯავდეს საკუთარ რესურსს, ვინაიდან მისი და მის დაქვემდებარებაში მყოფი გუნდის, დივიზიონისა თუ დანაყოფის წარმატება უპირველესად სწორედ იმაზეა დამოკიდებული, თუ როგორი თანამშრომლები ჰყავს მას.

ხშირად ლიდერები ძალიან დაკავებულები არიან გლობალური თემებითა და საკითხებით, მაგალითად როგორ გახადონ კომპანია უფრო დიდი, როგორ დანერგონ ახალი ინოვაციური სისტემები და პროცესები და ა.შ..  მაგრამ ავიწყდებათ, რომ თანამშრომლების ხარისხი ყველაზე დიდი კონკურენტული უპირატესობაა. სწორედ მათზეა დამოკიდებული როგორ შესრულდება საქმე, როგორ მიიღწევა მიზნები, როგორ გაიზრდება და განვითარდება ორგანიზაცია. საჭირო ადგილას საჭირო თანამშრომლის არსებობა წინაპირობაა ყოველი წარმატებისა.

ამიტომაც, ლიდერი აუცილებლად უნდა მონაწილეობდეს კადრების შერჩევაში, ვინაიდან ეს საკითხი ძალზედ საპასუხისმგებლო და მნიშვნელოვანია, ხოლო კადრების მენეჯერს ან სხვა პირს იშვიათად ეცოდინება ლიდერზე უკეთ, ზუსტად როგორი კადრი სჭირდებათ და აპლიკანტებიდან ყველაზე მეტად რომელი შეეფერება კონკრეტულ პოზიციას.

რა თქმა უნდა, ხელმძღვანელი მთლიანად რეკრუტინგის პროცესში ვერ იქნება ჩართული, მაგრამ მოთხოვნების ჩამოყალიბებაში, კადრების მოძიების გზებისა და არხების დამუშავებაში, ასევე საბოლოო გადაწყვეტილების მიღებაში აუცილებლად უნდა მიიღოს მონაწილეობა.