ის, რომ კლიენტებს ყველაზე ობიექტური შეხედულებები გააჩნიათ ჩვენს პროდუქტებსა და მომსახურებებზე, არავისთვის საიდუმლოს არ წარმოადგენს. თუ ამ ინფორმაციას “ჩავიგდებთ ხელში”, შევძლებთ აღმოვაჩინოთ ის ხარვეზები, რაც ყველაზე მეტად არ მოსწონთ კლიენტებს, შევძლებთ დავინახოთ გაუმჯობესების შესაძლებლობები და სწორი მიმართულებით განვავითაროთ ჩვენი პროდუქტები/სერვისები.

ამის მრავალი მეთოდი არსებობს, შემოგთავაზებთ რამდენიმე მიდგომას:

1. რეაქტიული არხების განვითარება – მივცეთ რაც შეიძლება მეტი საშუალება კლიენტებს, დააფიქსირონ საკუთარი აზრი: საიტზე, სოციალურ ქსელებზე კომენტარების დატოვების შესაძლებლობები, ყუთების განთავსება, სადაც ჩვენი მომხმარებლები ჩააგდებენ თავიანთ მოსაზრებებს, შეფუთვაზე წარწერის გაკეთება: მოგვწერეთ თქვენი შენიშვნა, ელ.ფოსტის მითითებით, ტელეფონის ნომერი, სადაც ნებისმიერს შეეძლება დარეკოს და გამოთქვას მოსაზრება. საჭიროა ასევე ამ არხების მუდმივი პროპაგანდა, კლიენტებისათვის შეხსენება, რომ დატოვონ კომენტარი, რომ მათი აზრი ძალიან მნიშვნელოვანია. ასევე კარგი ინსტრუმენტი არის google alerts, სადაც შეგიძლიათ მიუთითოთ თქვენი კომპანიის, პროდუქტის დასახელება და სხვა თქვენთან დაკავშირებული “გასაღები სიტყვები”, რომლის ინტერნეტში “ხსენებისთანავე” შედეგად ელ.ფოსტაზე ავტომატურად მოგივათ ბმული.

2. პროაქტიური არხების განვითარება – კლიენტების გამოკითხვა მათთან ურთიერთობისას, ფორმის შევსება მათ მიერ, იგივე გამოკითხვა შეიძლება ინტერნეტის საშუალებით გავრცელდეს ელექტრონულად. კლიენტების ტელეფონის ან სხვა კონტაქტების შემთხვევაში პერიოდულად დაკავშირება შერჩევით და მცირე კითხვების დასმა. თუ თქვენს პროდუქტს ფართოდ მოიხმარენ, მაშინ ქუჩებში, სხვადასხვა პუნქტებში შესაძლებელია გამოკითხვის ჩატარებაც.

რა თქმა უნდა, მრავალი მარტივი გზა არსებობს კლიენტების აზრის გასაგებად, მთავარია ორგანიზაციას ჰქონდეს ამის სურვილი და გამოყოს პიროვნება, ვინც პასუხისმგებელი იქნება ამ ამოცანაზე და მუდმივად იფიქრებს მასზე.