ადამიანები იმას აკეთებენ, რაც მათი პოზიციის დასახელებაში წერია ან ქვედანაყოფს ჰქვია და არა იმას, რასაც მათი დებულება ან სამუშაოს აღწერა განსაზღვრავს.

ამიტომ სტრუქტურაზე მუშაობისას ძალიან დიდი მნიშვნელობა აქვს რამდენად სწორად მოხდება თითოეული პოზიციის თუ სამსახურის დასახელების შერჩევა.

ყოველთვის უნდა ვეცადოთ, დასახელება რაც შეიძლება ზუსტად ასახავდეს ერთეულის პასუხისმგებლობას, მიუხედავად იმისა, რამდენად გავრცელებულია ასეთი დასახელება სტრუქტურების მსოფლიო პრაქტიკაში.

დასახელებაში სასურვალია ყოველთვის ჩანდეს ამოცანა და არა ფუნქცია. ეს მასზე პასუხისმგებელ ადამიანს მეტ მუხტს მისცემს და შემოქმედებით მუშაობას აიძულებს.

დასახელება არ უნდა იყოს ზედმეტად ზოგადი, რათა გაურკვევლობები არ გააჩინოს, არა მარტო სხვების მოლოდინებში ამ ერთეულის მიმართ, არამედ თვითონ ამ ერთეულზე პასუხისმგებელ თანამშრომელში.

დასახელება არ უნდა იყოს ზედმეტად კონკრეტული, რომ ხვალ ახალი დავალების მიცემა და დამატება არ გაართულოს დასახელების ცვლილების გარეშე.

სწორად შერჩეულ დასახელებას არანაკლები მნიშვნელობა აქვს, ვიდრე კარგად დაწერილ დებულებას ან სამუშაოს აღწერას. ამ უკანასკნელ დოკუმენტებში ადამიანები გაკეთების შემდეგ ან საერთოდ აღარ იყურებიან, ან მხოლოდ ძალიან კრიტიკულ, განსაკუთრებულ შემთხვევებში და მაშინაც არ ანიჭებენ მასში არსებულ ჩანაწერებს რეალურად დიდ მნიშვნელობას.