არჩევნებზე რომ მეტი ამომრჩეველი მოდიოდეს, ცესკო-ს პირდაპირი პასუხისმგებლობა და მისი სტრუქტურის წინაშე მდგარი ამოცანაა. სათანადოდ თუ ვერ გადაჭრის, ეს იმას ნიშნავს, რომ დანიშნულებას: “ასახოს საზოგადოების აზრი”, უხარისხოდ ან ვერ შეასრულებს.

სტრუქტურას ერთი მარტივი წესი აქვს. თუ ორგანიზაციისთვის სტრატეგიულად მნიშვნელოვან ამოცანას, ამ შემთხვევაში ამომრჩევლების მაქსიმალურად შესაძლებელი რაოდენობის მოყვანას არჩევნებზე, არ ყავს “პატრონი” სტრუქტურაში, ის ამოცანა ვერ იჭრება, ან იჭრება არასისტემურად და ნაწყვეტ-ნაწყვეტ.

სანამ ცესკო-ს სტრუქტურაში მკაფიოდ არ მოხდება ამ ამოცანაზე პასუხისმგებელი პირის გაჩენა, რომელიც დაიწყებს ზრუნვას ამომჩევლებში არჩევნებში მონაწილეობის კულტურის გაძლიერებაზე, ინდივიდუალური არჩევნების პრომოუშენზე, ხმის მიცემის შესაძლებლობების გამარტივებასა და გამრავალფეროვნებაზე,  მაღალი სანდოობის უზრუნველყოფაზე, მანამ ცესკო იქნება ნაკლებად უნარიანი და ნაკლებად წარმატებული – მოიყვანოს მეტი ადამიანი არჩევნებზე.

არჩევნებზე ამომრჩევლების მაღალი აქტივობის უზრუნველყოფის პასუხისმგებლობა პოლიტიკურ პარტიებსა და კანდიდატებზე მეტად ცესკოს აკისრია. რაც უფრო სტაბილური გახდება მდგომარეობა, ქვეყანა განვითარების სხვა საფეხურზე გადავა, უფრო გაჭირდება ადამიანების არჩევნებზე მოყვანა, რადგან მათი ინტერესი, ჩაერიონ ქვეყნის პოლიტიკურ ცხოვრებაში შედარებით ნაკლები იქნება. შესაბამისად  უფრო კრიტიკული გახდება ამომრჩევლების მაქსიმალური სტიმულირება და სათანადო პირობების შექმნა, რომ არჩევნებში მონაწილეობის ინტერესი და შესაძლებლობა ჰქონდეთ.

განვითარებული ქვეყნების საარჩევნო პრაქტიკა გვაჩვენებს, რომ იქ აქტივობა არათუ დაბალია, არამედ რიგ ქვეყნებში 60-70%-ს აღემატება. ამის მიღწევაში გადამწყვეტი როლი არჩევნების ორგანიზებაზე პასუხისმგებელ სტრუქტურებს აქვთ. შვედეთი, გერმანია, ესტონეთი, ავსტრალია, ახალი ზელანდია ის ქვეყნებია, სადაც ამომრჩეველთა აქტივობა  სტაბილურად მაღალია. ამ მაჩვენებლის მიღწევის ერთ-ერთი მნიშვნელოვანი წინაპირობა, ამ ამოცანის სტრუქტურულად სწორად გადაჭრაა. ყველგან, სადაც მაღალია აქტივობის მაჩვენებელი, იმ ქვეყნებს სტრუქტურაში მინიმუმ 1 პასუხისმგებელი პირი ჰყავთ ტოპ-მენეჯმენტში ამ ამოცანაზე, რომლებიც რუტინულ რეჟიმში მუშაობენ ამომრჩევლების განათლებაზე, საარჩევნო აქტივობების უწყვეტ კომუნიკაციაზე და ადამიანების წახალისებაზე, რომ მოვიდნენ არჩევნებზე.

ბოლო, 2014 წლის არჩევნები, ამ გამოწვევის ერთ-ერთი დადასტურება იყო. რაც მალე დაიწყებს ცესკო სტრუქტურულად ამ ამოცანის გადაწყვეტას, მით უფრო მომზადებული შეხვედება შემდეგ არჩევნებს და, რაც მთავარია, მით უფრო ღირსეულად შეძლებს სახელმწიფოსგან დაკისრებული დანიშნულების შესრულებას.