პასუხისმგებლობა არის მთავარი სიტყვა შრომის ორგანიზაციაში. სწორედ მასზე შენდება ნებისმიერი ორგანიზაცია, საჯარო იქნება თუ კერძო, ოჯახი იქნება ის, კომპანია თუ სახელმწიფო. რაც უფრო ცხადად და სწორად არის განსაზღვრული ადამიანის პასუხისმგებლობა ორგანიზაციაში, მით უფრო ენერგიული, დინამიური და, შესაბამისად, წარმატებულია ის.

და აი, რატომ:

პასუხისმგებლობა გაცილებით დიდი მოტივატორია, ვიდრე ნებისმიერი მოტივაციის სისტემა. ადამიანებისთვის სამსახურის შენარჩუნება და კარიერის გაკეთება, როგორც წესი, უფრო მნიშვნელოვანია, ვიდრე კონკრეტულად რამდენ პრემიას წაიღებს ამ თვეში სახლში. ამიტომ ისინი უფრო ცდილობენ, ის გააკეთონ, რაზეც იციან, რომ პასუხისმგებლობა აკისრიათ და მერე იფიქრონ იმაზე, საიდან აიღებენ დამატებით პრემიას.

პასუხისმგებლობა გაცილებით უკეთესი მასწავლებელია, ვიდრე ნებისმიერი სასწავლო პროგრამა თუ უმაღლესი სასწავლებელი. როდესაც ადამიანმა ზუსტად იცის, რა არის მისი პასუხისმგებლობა, ეძებს ინფორმაციას, ლიტერატურას, ვიდეო-რგოლებს და ყველაფერს ისრუტავს იქიდან.

პასუხისმგებლობა გაცილებით დიდი შთაგონების წყაროა ახალი იდეებისა და ინიციატივებისთვის, ვიდრე ნებისმიერი მუზა. როდესაც მენეჯმენტის დიდი შემადგენლობა გელოდება კონკრეტულ დღეს კონკრეტულ შეხვედრაზე, სადაც იდეები უნდა წარადგინო კონკრეტული ამოცანის გადასაწყვეტად, ეს იდეები ყოველთვის საიდანღაც ჩნდება და მათი ხარისხიც, როგორც წესი, ცუდი არ არის.

პასუხისმგებლობა გვაიძულებს, გაცილებით მეტი ყურადღებით მოვუსმინოთ სხვებს და გაცილებით მეტი ვიფიქროთ, სანამ ნაბიჯს გადავდგამთ. ეს ნიშნავს, რომ, რაც უფრო დიდია პასუხისმგებლობა, მით უფრო ბრძენდება ადამიანი.

სწორედ ამიტომ იცვლება ადამიანების ქცევა რადიკალურად, როდესაც მათ პასუხისმგებლობა ეცვლებათ.

ჩვენი კლიენტები, ორგანიზაციული სტრუქტურის განვითარების პროექტებში, ჩვენგან სწორედ იმას ელიან, რომ დავეხმარებით უფრო ცხადად და უფრო სწორად გადაანაწილონ პასუხისმგებლობები თანამშრომლებს შორის, რათა მათ უფრო მეტი და უფრო სწორად იმუშაონ, მეტი იდეები და ინიციატივები დაბადონ და ამასთან გაცილებით ყურადღებით მოუსმინონ ერთმანეთს.