თუ გადაწყვეტილი არ გვაქვს, რომ დავპოზიციონირდეთ როგორც დაბალი ფასების მქონე კომპანია. რაც იმას ნიშნავს, რომ ასორტიმენტი, მომსახურება, გაყიდვების სისტემა, ბრენდის კონცეფცია, საკადრო პოლიტიკა და ყველაფერი დანარჩენი ამ იდეას თუ არ გვინდა მოვარგოთ მაშინ ჯობს დაბალი ფასებით კლიენტების მოკლევადიანად მოზიდვას არც ვეცადოთ. ვინაიდან ამ კლიენტებს მერე ჩვენ ფასს ვეღარ გავუზრდით. მათი შენარჩუნებისთვის კი სულ უფრო მეტი ხარჯის გაწევა მოგვიწევს.

ხშირად ხდება ხოლმე, რომ ესა თუ ის კომპანია, ძირითადად ვაჭრობის სფეროდან, მოკლევადიანი მიზნების მისაღწევად ფასების მკვეთრი შემცირების პოლიტიკას იყენებს. შედეგებსაც აღწევს მოკლე ვადაში, გაყიდვებსაც ზრდის და ბაზრის წილსაც.

თუმცა ეს სტრატეგია მკაცრი დიეტებით წონის მოკლე ვადაში დაკლებას ჰგავს. როგორც კი შეეცდები, რომ ფასები გაასწორო ეს გაყიდვებიც და ეს ბაზარიც ისევ უკან წავა, თუ საბოლოოდ არ გადაწყვეტ, რომ ამ კლიენტებზე დარჩე პოზიციონირებული როგორც მთავარ სეგმენტზე და შენი ფილიალების მოწყობასაც, კადრებით დაკომპლექტებას, მათი ანაზღაურების სისტემებს, გაყიდვების მიდგომას და, რაც მთავარია, ბრენდს და მთლიანი ასოტრიმენტის მართვის სტრატეგიასაც ფასებზე განსაკუთრებულად მგრძნობიარე კლიენტებზე არ მოარგებ.